一次又一次既傷─〉得不到的愛

(19)

出到去見到熱吻亞兒就知道已經俾佢呃左，其實未出去都知ga啦……跟住亞兒就同熱吻搭的士送熱吻返牛頭角啦！一上車熱吻就挨左落亞兒既膊頭度，亞兒都覺得無乜野，只係諗熱吻應該太累所以先會挨落自己度。不過隔左一陣之後熱吻拖住左亞兒隻手，亞兒覺得好出奇，但係亞兒自己都唔想放手所以就由得熱吻一直拖住自己。終於返到牛頭角啦……亞兒送熱吻上樓，熱吻一開門就知道佢屋企原來有人喎，跟住佢就即刻關門走啦，亞兒就o係度諗佢究竟做咩呢？點解唔返屋企？於是亞兒就追住熱吻問佢做咩唔返屋企？熱吻咩都無講就只係坐左o係屋企樓下唔出聲，睇起個樣上唻好似好辛苦，雖然佢係無醉，但係佢始終都係飲左好多酒，所以都幾辛苦ga。亞兒見佢咁樣就行埋去問佢有無事啦，不過熱吻都係無出到聲，咁亞兒咪只好唔出聲企埋一邊law。過左一陣熱吻終於講野啦！

熱吻：【你可唔可以對我好o的呀？】

亞兒(無奈)：【o下……我仲對你唔好呀？俾著第二個我真係唔會出唻送佢返屋企呀！】

亞兒講完呢句說話之後熱吻就行左去亞兒面前錫佢，亞兒o係一個唔知道既情況底下就梗係推開熱吻啦，因為佢都唔知發生咩事，一直亞兒都只係用朋友既態度對熱吻，因為佢唔想俾熱吻知道佢自己係仲愛佢。不過真係好似戲入面o個o的咁ga，如果點都推唔開個男仔之後就真係會乖乖地就範ga啦！錫完之後熱吻攬住亞兒同亞兒講左一番亞兒意想不到既說話。

熱吻：【我地可唔可以o係返埋一齊呀？我好掛住你妳呀！】

亞兒：【你飲大左啦！】

熱吻：【我無呀！我好清醒，我知道我自己講緊咩！同妳分左手之後我覺得我好對妳唔住。】

亞兒(感動+喊)：【傻啦！我無嬲過你，咁耐以唻我一次都無嬲過你】

講完之後熱吻就話不如返沙田啦！所以亞兒就同熱吻一齊返左沙田，但係返到沙田既屋企之後原來又有人o係屋企喎，咁熱吻就又唔返去同亞兒坐左o係樓梯口，亞兒知道熱吻飲左咁多酒應該好辛苦ga啦，所以就叫熱吻返屋企唔洗陪佢，但係熱吻就死都唔肯係都要陪亞兒。坐左一陣之後等熱吻既屋企人走左之後佢地就一齊返去訓覺啦！就係咁樣亞兒又同返熱吻一齊。真開心呀~~~~
到左第二日熱吻一個電話都無打俾亞兒喎，所以亞兒就o係度諗：【其實佢o個日係咪真係飲大左，依家酒醒啦已經唔記得同我講過o的咩做過咩啦！】以亞兒既性格呢o的咁既唔清唔楚既關係佢一定會問清楚熱吻，就算個答案係唔好既亞兒都要得個知字，於是佢就打電話問清楚熱吻依家大家係咩關係同埋仲記唔記得琴晚同亞兒做過咩講過咩？熱吻一聽到亞兒咁講就只係講左一句說話

熱吻：【係咩關係都唔洗再講啦！琴晚所做既野已經証明左啦！】

聽到咁樣亞兒終於都放心啦！

NEXT

作 者 ： 吻兒

與作者聯絡