一次又一次既傷─〉得不到的愛

(16)

唔知點解時間係咁難過，每日亞兒都提心吊膽咁過，因為每一日亞兒都好怕會係同熱吻一齊既最後一日。o個晚之後唔係過左好耐有一晚熱吻又再一次同亞兒講分手，亞兒既惡夢又再一次來臨，都唔明白應該只有第一次既分手先會覺得最心痛，之後既分手應該只會感到心淡，應該無第一次咁傷心ga？但係亞兒o岩o岩相反，佢一次比一次傷心，受既傷一次比一次大，今次亞兒真係再接受唔到啦，佢絕對係有尋死既念頭。【咁到最後就梗係無死到啦，如果唔係今日又點寫呢個故事呢？】直覺話俾亞兒知道今次又係出現左第三者所以先會分手，但係熱吻就死都話無o的咁既事。第二日亞兒都無哂心機，仲要成日都唔食野tim，熱吻知道左之後就打俾亞兒叫亞兒快o的食野，聽到咁樣亞兒就同熱吻講：【我食唔食野都唔再關你事啦，你理我唻做咩喎！】意外地熱吻竟然答返亞兒話：【我打得返唻你都知係咩事啦，咁樣你仲話關唔關我事呀？】哈哈•••再一次一齊令到亞兒好開心，之後就梗係聽聽話話咁食野啦。

有時真係覺得幸福係唔屬於亞兒ga，因為過左一個星期都無，亞兒既朋友有一日打俾亞兒同亞兒講o係街見到熱吻搭住個女仔一齊行街，亞兒知道呢個朋友一定唔會講大話呃佢，但係佢又好唔想呢個係事實，所以佢就好冷靜咁約熱吻出唻傾，係男人都唔會認自己一腳踏兩船啦，o係呢個咁無奈既情況底下亞兒明知道熱吻係有第二個ga啦，但係佢又真係好唔想同熱吻分開，亞兒問左自己一個問題：【究竟我依家咁樣忍會痛苦o的定係同熱吻分開痛苦o的？】最後個答案就梗係(同熱吻分開會痛苦o的啦)所以亞兒當無事發生過咩都唔知道。

之後既日子有段時間係好開心ga，每逢星期6亞兒就會去熱吻屋企一齊訓覺，第二朝一齊去放狗，o個種感覺真係好正，放完狗就去食野，食完野仲一齊去睇戲，連續兩個星期都係咁樣，亞兒真係好開心。但係o係一次睇戲既時候熱吻竟然當住亞兒既面前同電話入面既人講：【咁你補完習打俾我啦！】亞兒聽到真係好傷心，就算點蠢既女人都會知道電話入面既人同熱吻係咩關係，亞兒真係好想喊，但係佢又唔可以俾熱吻知道佢喊，所以佢只係扮撒嬌挨落熱吻既膊頭，其實呢個時候亞兒係o係度喊緊，咁大個女真係未試過睇警匪片睇到喊ga。攪到咁樣亞兒都知道唔可能再同熱吻一齊得好耐，所以亞兒好珍惜每一日同熱吻一齊既時間。就o係o個個月既最後一日亞兒同熱吻又再一次分手啦，雖然今次分手係亞兒講既，不過係人都諗得到亞兒根本就唔係想同熱吻分開，因為亞兒曾經同熱吻講過一句說話【如果你要我自己揀離開你既我會比你唔要我更加痛苦】但係點解今次亞兒要同熱吻講分手呢？其實係因為佢知道熱吻同自己一齊都唔開心，更加知道熱吻係因為唔想再做衰人所以先唔講分手，所以亞兒就忍痛同熱吻講左分手呢兩個字。呢次係亞兒第二次同熱吻講分手，由上次亞兒高估左自己o係熱吻心目中既地位，今次係第二次亦都係最後一次，其實亞兒同自己講過唔會再同熱吻講呢兩個字，但係為左熱吻開心所以亞兒無得揀！

NEXT

作 者 ： 吻兒

與作者聯絡